कबिताहरु

Sunday, November 10, 2013

उदघोष ...!!!

तिम्रो बाटो हेर्दै 
दिन बिताएका ति पलहरु 
आजकल 
तस्बिर हेर्दै जिन्दगी काट्ने 
यि रहरहरु 
आँफैमा सपना बनेर 
मिठा निदहरु बनिरहेका छन । 

त्यो बेला 
शाहस गरेर 
मुटु भित्र कोरेका 
केही तस्बिरहरु नै साहरा बनेर 
यात्रामा टुकु टुकु पदचाप बढाइरहेका छन  
तर पनि    
गन्तब्य बिहिन भएर 
अल्मलिनु पर्दा 
नमिठो लाग्दो रहेछ 

त्यसैले, आजभोली म  
गण्डकी झै बगिरहेको छु 
कुना कन्दरा लछार्दै बाटो खोजिरहेको छु 
तिमीलाई उठाइ लगेको 
यमराजलाई भेट्न भनेर ....!!!


Sunday, October 27, 2013


डेढ ड्रिम

मंगलघाट को पुल तरेर
उकालै उकालो
चिसो हावा खाँदै
पिपलडाँडा को चौपारी मा पुगेर
तिम्रो हात बाट चिसो पानी
पिउँदा का ति पलहरु
सम्झना बनेर
काली खोलाको मसानघाट बाट
ब्युझिएर आएको भुत ले झै
मेरो निन्द्रा तर्साइरहेको छ्

शायद तिमी र म
हामी हुन नसकेको पिडा
बाटोमा भेटदा पनि
मुन्टो बटार्नु पर्ने तिम्रो बाध्यता
म हिंड्ने गोरेटाहरु मा
आट्टिको झ्याल बाट चियाउने
तिम्रा नजरहरुमा
आजकल फुलस्टप लागेर होला
मलाई किलिकिली बाँडुली लाग्न छोडेको छ

तर पनि
किन हो खै
पूर्ण बिराम लागेका हाम्रा कथाहरुले
अझै पात्र खोजिरहेको जस्तो
या अझै लेखिन बाँकी अक्षरहरु बोकेर म 
मसी सकिएको कलम जस्तै
पर्खिरहेको छु
दुई थोपा पसिना चुहाउदै
एक थोपा मसिको लागि
ता कि
बन्चरे ढुङ्गाको चौपारीमा पुगेर
लामो श्वास तान्दै
सोच्न सक्नेछु
जिबन मा तिमी धेरै माथि पुगे पनि
या म चिप्लिएर भुँईमा लढे पनि
तिमीलाई बेनी बजार मै हराएर
धेरै उकालो उक्लिसकेको छु
धेरै माथि ज्यामरुककोटको मन्दिर सम्मा
तिमी देखी धेरै टाढा !!


===================================
दसैं आयो !! आँसु खासायो





















यता सुन्छु उता हेर्छु चारैतिर दसैं आयो 

सम्झेर आज आफ्नो गाउँघर मेरो आँखा रसायो 

गाउँका टोल टोलहरु लिङे पिंगमा नाँच्दैहोलान 
कमेरो र रातो माटोले घरहरु साँज्दैहोलान 
पर्खेथिन नि प्रियसिले प्रदेसी घर फर्किआउँला भनी 
सोच्थिहोलिन दु:ख सुख दसैं सँगै मनाउँला भनी 

यो साल पनि यस्तै भयो सार्है उदास बनायो 
सम्झेर आज आफ्नो घर मेरो आँखा रसायो 

बाबाले मलाई फोनमा भन्थे दसैंमा छोरालाई पक्कै भेट्छु भनी 
आमा भन्थिन धेरै पछीको मनको न्यास्रो पक्कै मेट्छु भनी 
गाउँले ले भन्थे यो दसैंमा लाहुरे पक्कै पनि आउछ होला 
प्रदेसी फर्के गाउँघरमा त पक्कै रमाइलोले छाउँछ होला 


सोचेको जस्तो नहुनी रैछ् आखिर खुशी नै हरायो 
सम्झेर आज गाउँघर आफ्नो यि आँखा रसायो

म नाआएनी साथी र संगी दसैं मा रमाउनु 
फोटो हेरेरै हे मेरी प्रिया यो दसैं मनाउनु 
शुभकामना मेरो समुन्द्र पारीबाट स्विकार्नु सबैले 
प्रदेसिले माया मार्यो भनी नसोच्नु कसैले 

यता सुन्छु उता हेर्छु चारैतिर दसैं आयो 
सम्झेर आज आफ्नो गाउँघर मेरो आँखा रसायो





















=================================================================
सम्पूर्ण मेरा आत्मिय साथीहरु, आफन्तहरु देस बिदेस मा रहनुहुने सम्पूर्ण नेपालीहरु तथा यो ब्लग लाई माया गरी सधैं पढिदिने पाठकहरु सबैमा 2070 सालको बिजयदशमी को हार्दिक मंगल्माया शुभकामना !! यहाँरुको दसैं हर्ष उल्लासले बितोस !!
=================================================================

No comments: